Skreine.org

23. apreļs – 105 godi nu drukys aizlīguma atceļšonys.
(26.-27. apreļs pa vacam) 9.-10. majs – 92 godi nu Rāznis kongresa.

Cīš svareigi datumi Latgolys kalendarī. Nu ūtrys pusis – gondreiž nikaidys publicitatis. Nav svātku sajyutys.

Kai jyusim?

Kaidu šalti atpakaļ pasaruodeja draugiem.lv latgaliskuo verseja – munidraugi.lv. Beja nalelys problemys – latgališu interfeisā nasaruodeja vuorda dīnys i vel šys tys, bet kupumā projekts beja nūzeimeiga ar tū, ka jys myusim kotru dīnu saceja – hei – mes asom, dzeivojam, mes naasom naradzamī cylvāki, kai vaļdeiba dūmoj…

Šudiņ īsavieru – pyrmajā draugiem.lv lopā vairs nav saitis iz volūdu “latgaliski”, domens munidraugi.lv atsataisa iz latvīšu verseju. Ni vuorda, ni grama latgaliski.

“Breineiga” duovona Rāznis kongresa 92. godadīnā. Otkol Latvejys apsavīnuošonuos, tik tagad gon Internetā. Bet ir lītys, kas nasamaina – apsavīnuošonuos, iz riekina latgaliskuo, pagaisynojut tū… Otkon i otkon.

Var saprast ari projekta turātuojus – kotrys volūdys izturiešona ir papyldu izdavumi. Veļ vīnu reizi latgalīšu volūda nav sevi komerciali attaisnuojuse.

Grybātūs dzierdēt komentarus nu cylvāku, kas beja īsaisteiti draugiem.lv latgaliskuošonā. Nasagribātūs, lai latgališu kūpīna itū kluseņom nūrei…

Vysleluokuo bāda braucūt da sātai ir tei, ka ir tikai vīna jūsla kotrā virzīnī, veidojās kolonnys, apdzeišonys i navajadzeigs risks. Tys vyss ir iz vacuos lobuos A6 (Reiga – Daugpiļs) šosejys.

Jamam tolkā Google maps, jam ir breineigs instruments – maršruta izvēle (Get directions). I tai – rokstu vydā – braucam nu Purčika da Seiļukolnam. Wiiiiiiiiii – lels beja muns prīks, ka Google dūmoj, ka man nimoz i navajag braukt kolonnā pa A6, es varu turētīs pa keirai rūkai nu A6 i iz juos izbraukt tik Kūknuojā (Koknese): Purčiks (voi Slāvu aplis) – Ulbroka – Stopiņi – Ikšķiles lauku teritorija – Krape – Koknese.  Saceits – dareits.

Da Ķeguma pagrīzīņā – breineigai, pa lelai daļai svaigs asfalts, gluds kai golds. Tod īt drupeit asfalts, drupeit loba “gruntovka”.  Tuoļuok īt Krape – “gruntovka” beidzās, suocās dubļi, izmysums i vysa laiceiguo izgaišonys apcere 5-7 km garumā (šaļtim lykuos ka vajadzēs īt meklēt belarusa ar kū vilkt myus uorā, iz kartis atzeimuots ar sorkonu). Kūknuojs, asom iz A6, tuoļuok Pļaveņis, Jākupiļs i.t.t. Vysa itamā braucīnī gruntovka kaidi 35 km, nu kurim 7 km šaušaleigi.

Ituo eksperimenta rezultātā idealais maršruts ir atrosts: Slāvu aplis – Ulbroka – Stopiņi – Ogre i tuoļuok pa A6 (maršruts kartē atzeimāts ar zylu). Idealuo maršruta variaceja – iz A6 izbraucam/nūbraucam Ķegumā (apzeimāts iz kartis ar zaļū). Saleidzynuojuymā ar idealū maršrutu tys ir plus 14 km  (10 min), bet, braucūt nu Latgolys svādinis vokorā, kod Ķegumā jau ir kolonna, ir vērts raut pa labi i pyust praktiski pa tukšu šoseju.

Visim lobu ceļavieju.

Jezus jai saceja: “Naaizturi vairs mani, par tū ka es vel naasu uzkuops pi Tāva. Bet ej da munim bruoļim i jim pasoki: “Es aizeju pi sova Tāva i jyusu Tāva, i pi sova Dīva i pi jyusu Dīva.”

Nu laika gola Jezupa dīna ir bejuse paradzāta kai dīna gavieņa vydā kod var pasajautruotīs, nūbraukt da tierga, krūga, voi, gols golā – kuozys nūdzert.

Ituo goda Jezupa dīna Reigā beja megatuss – Kongresu noms iz procentim 80 beja pylns ar latgalīšim, kas beja atguojuši pasavērt i pasaklauseit iz sovom grupom. Beja Bez PVN, Patrioti.LG i cytys mozuokys zvaigznis. Īeja par zīduojumim, kas tiks izlītuoti, lai raudzeitu LR atgrīzt latgalīšim.

Iz skatuvis fonā beja lels, dzaltons banners – Latgolys radejys logo, piļsātys i frekvencis. Tai kai radeja vairs nav tei kas beja, frekvenču cipari nūkaseiti ci aizleimāti. Irā i tymā poš laikā nav. Sireala sajyuta – kai sapynā reizem ir bejs – turi rūkā gruomotu, redzi lopys, papeira strukturu, burtus i teksta ryndys, jyuti vuoka fakturu, a teksta puorskaiteit navari. Par tū ka juo nav. Par tū ka jys nav vajadzeigs konkretajā sapyna sižeta linejā, i smadzinis  natierej resursa iz tū lai jū saģenerātu.

Cīš ceru ka sapyns par Latgolys Radeju nav izsapynāts. Veiksmis aktivistim, kas jamās pi radejys atgrīšonus cylvākim.

Pādejuos zinis Latgolys Radejys stuostā:

Leluokuo dale Latgolys regionalūs laikrokstu irā līgušīs izvītuot nalykumeigūs „Latgolys radejis“ tānejūs sovinīku „Love Radio“ reklamys.

Bīdreiba „LR“ irā sajāmusi inpormaceji, ka gazetys „Azarzeme“, „Latgolys laiks“, „Ludzys zeme“, „Nūvodnīks“, „Rēznis viests“ i „Vadguņs“ irā sajāmušs pīduovuojumus nu nalykumeigūs SIA „MG Latgolas Bolss“ tānejūs sovinīku – Viktora Dobkeviča i Jevgeneja Cariova – par retranslejamuos Krīvejis radejis staņcejis „Love Radio“ reklamys izvītuošonu, bet principialai izsprīdušs solidarizētīs ar „Latgolys radeji“ i juos atspaida bīdreibu „LR“ i itaidu reklamu gazetuos naizvītuot.

Cik zamai juobyut vīna medeja reputacejai, lai citi medeji krīzis laikā atsasaceitu nu tuo jimt naudu par reklamu???

Cylvākim ir cīš greiza izpratne par latgalīšu volūdu i juos normativū bāzi. Bolstūtīs iz vacū lobū lelReigys šoviņismu i naproporcionali mozū myusu volūdys purstuoveibu školu programmuos, vydsmāra puornūvadnīks dūmoj, ka kotrā pogostā ir sova latgalīšu volūda, kas vyspuor nav volūda, a tai – tei poša latvīšu volūda ar puorgrūzeitim burtim + drupeit krīvu i poļaku vuordu.

Ite man juopasoka vins styngrs vuords – duorgī draugi – latgalīšu volūda nav ni par gramu pruostuoka, kai tei, kuramā televizors runoj… Volūda ir normāta, pareizraksteibys nūteikumi dokumentāti i nupublicāti Latvejys Viestnesī.

Itū vajag zynuot i ar napīspīstu eleganci īspraust zūbūs sevkuram šoviņistam, kas rauga apšaubeit latgaļu volūdys statusu.

Latgalīšu raksteibys nūteikumi: http://www.vestnesis.lv/index.php?menu=doc&id=164904

Šudiņ munā eposta skreinē īkryta paziņuojums:

“Portālā draugiem.lv jūsu albumam tika pievienota jauna galerija.: ‘LOBDAREIBYS KONCERTS’”

Opā – paguoduoju es… Voi nu muns draugu profils dzeivoj sovu, iz tehnoloģiskim gļukim baļsteitu dzeivi, voi ari kaids lobs draugs ir nazkū nūpubliciejs munā albumā (ite sekoj filosofiskys puordūmys ar greku burta “pī” pīlītuošonu par draugiem.lv drūšeibys politikom i saisteibu atrunom).

Atbraucejs pierduknis, eimu vydā, tivleit īvešsu kuorteibu. A prīškā – nikaidys ļaundareibys. Viļuminators (aka Jureits) īpubliciejs Jezupa dīnys koncerta afišu. Cāls mierķs ar loba sābra rūkom, laukā naravēsim.

Īsoku visim nūīt, izaverās ka byus lobs.