Kolnasāta raidejums – breineigs resurss škārsteiklā February 10, 2016

Kas ir radeja i radejys raidejums? Tev juozyna programma i konkretā dīnā i laikā juoīslādz aparats iz konkretū staceju, napaspieji – nadzierdieji? NĀ!

Sev par nalelu puorsteigumu atkluoju, ka sevkuru “Kolnasātys” raidejumu var saglobuot mp3 formatā i klauseitīs,  par pīmāru, telefonā ceļā iz dorbu. Tai šudiņ nūsaklausejūs 2015. gods 1. augusta raidejumu “Aktīvie latgalieši. Kāpēc viņu ir tik maz?” – masa pozitivu emoceju – par pīmāru, LKB, RTA Ilga Šuplinska sovu patriotismu raksturoj ar paziņuojumu, ka gadīņī, ka kas, jei “jimtu plinti i ītu mežā” bet DU Arvīds Barševskis iz sevi atsasauc kei iz “pārčūļotu latgalieti” i styprai kritizej vaļsts izvastū centralizacejys polotiku.

Breineigs raidejuma vadeituoju Aigara Runča i Justīnis Savitskys dorbs, konsekventai intervejūt vysus ļauds latgaliski, ari gadejumūs, kod intervejamais atsoka baļtiskai, kas ir interesanta paruodeiba, da itam izplateita Ukrainā i Boltkrīvejā, kur bīžai radzami raidejumi, kur paralelai īt dominejūšuo krīvu volūda i lokaluo ukraiņu ci boltkrīvu volūda vīnys sarunys ītvorā. Svareiga itei paruodeiba ir deļ tam, ka jei paruoda latgalīšu volūdu kei pylnvierteigi funkcionejūšu volūdu i taipoš apstyprynoj faktu, ka ari baļtiski runojūši ļauds saprūt latgalīšu volūdu, par tū nūjamūt sevkuru vajadzeibu vīnā ūtrā sarunā puorsaslēgt nu latgalīšu iz baltīšu izlūksni.  Prūtams, ari raidejumu tematikys aktualitate ir naapstreidama – redakcejai, izaver, ir gon “čujs” gon “ņuhs”.

Latvejys ļaudiskuo medija platforma (lsm.lv), kura publicej “Kolnasātys” arhivu, pīduovoj itaidys vareibys, kas ir juoizlītoj:

  • saglobuot failu mp3 formatā – varim klauseitīs raidejumu “podkasta” režimā iz telefona nazkur ceļā;
  • klauseitīs sevkuru raidejumu ar datoru sevkurā laikā – navajag planavuot īslēgt LR tymā i tymā dīnā itamā stuņdē;
  • komentēt sevkuru raidejumu – varim izsaceit sovys dūmys par tematiku, dūt raidejumu autorim atsaiti;
  • nūruodeit iz Kolnasātys arhivu kei iz lobu latgalīšu runys volūdys olūtu, kū pasaklauseit ļautenim, kuri kei apmauti guodoj, ka latgalīšu volūda ir krīvu i poļaku volūdu mistris;
  • īguļt konkretus raidejumus sovūs blogūs (kai par pīmāru es izdareju itamā rokstā), sātys lopuos i.t.t. gadīņī ka rokstit par raidejumā runuotū tematiku.

Klausamīs poši i paruodam draugim. “Share” i “like”, kei soka.

1 komentārs
imka February 16th, 2016

Napaseņ nūzaklausiejūs Kolnasātu. Tī žurnāliste Gunta Nagle (laikam taids vuords) staiguoja pa Daugavpili i intervēja cylvākus par BBC filnu i 3.pasauļa kara īspiejameibu Latgolā. Jei ar daudzim Latgolys īdzeivuotuojim daugpilīšim runuoja čiuliskai. Kauns par taidu žurnālisti!
Prīks par Aigaru i Justīni, ka jī ar vysim runoj latgaliski. Guntai Noglai ir nazkaidi mozvierteibys kompleksi.

Iekomentē!