Preambulys vareibu lūgā nav gaismys latgalīšim November 4, 2013

Jau lobu šaļti sabīdreibā īt diskuseja par vajadzeibu pataiseit Satversmis preambulu – papyldynuojumu Latvejys pamatlykumam, kas definātu i precizātu izpratni par tū, kas ir vaļsts, deļ kam itei vaļsts pastuov, kaidys ir tuos pamatvierteibys i styurakmiņi – volūda, latvīteiba, kū golu golā zeimoj jiedzīņs „latvīts” i kai tamā raudzeit „īmaidzeit” Latvejys nalatvīšu pylsūņus i īdzeivuotuojus.

Ir saprūtama vaicuojuma aktualitāte, mes vysi labi pīmynam referendumu par vaļsts volūdu (2012) i kreisūs radikaļu gruobsteišonūs ap Latgolys automomejys vaicuojumu (2012) – aktivutatis kas pasūleitajā realizacejā īt preteimā tam, deļ kuo Latveja tyka dybynuota 1918. godā.

E. Levits ir sagatavejs Satversmis preambulys projektu, nūteik „sabīdriskuo apsprīšona”. I ir vīna līta, kuo es itamā procesā naradzu – es naradzu Latgolai, latgalīšu volūdai i latgaliskumam dereigu ideju lobiešonu.

Jamūt vārā viesturiskū kontekstu, kur Latgolys deputāti „nūbolsova ar kuojom” 1922. godā Satversmis apstyprynuošonys procesā deļ tam, ka baļtiskais vairuokums naļuove īlikt Satversmē F. Kempa īrūsynuotū normu „…Latgales apgabalā par oficiālo valodu tiek atzīta latgaliešu izloksne”, tagad ir lobs moments atsagrīst pi vaicuojuma par latgalīšu volūdys nūstyprynuošonys konstitucejā.

Nav garantejys, ka prīkšlykums tiks sadzierdāts i īlykts preambulā, tok itamā šaļtī vairuok ir runa par latgalīšu nūstuoju itamā vaicuojumā. Myusu dybynuotuojtāvi (Kempam, Trasunam i cytim pyrmskara latgalīšu puorstuovim navaru atrast pīmāruoruoka termina kei amerikaņu „founding fathers”) ar sovu reiceibu Satversmis pijimšonys procesā ir cīši skaidrai nūruodejuši iz tū, ka vaicuojums nav slāgts i tys ir aktualizejams, kod tam byus pīmāruoti apstuokļi. Taidā veidā tagad, itamā šaļtī, naatjaunojūt praseibu par latgalīšu voludys nūstyprynuošonu Satversmē, pošreizejī latgalīšus puorstuovušī deputāti cīši principialā vaicuojumā nūstuotu preteimā tūs uzstuodejumu kontiniutatei, iz kurim Latgola pastateja sovu pasauļaredzīni 1917. godā i turpynova uzturēt pyrmuos republikys laikā. Klusiešona i pasivitāte nu myusu deputātu  itamā momentā byutu tulkojama kei legitims apstyprynuojums tam, ka latgalīšim nav nikaidu pretenzeju pret tū, ka latgalīšu volūda Latvejā ir īdzeita folklorys rezervātā, kur degradej izneikšonys virzīnī.

Nasaverūtīs iz myusu puorstuovu pīkluojeigū klusiešonu, prīks ka vysmoz baļtīšu ļaudiskuo dūma ģenerej vaicuojumus par latgalīšu volūdys atrunuošonu preambulā, tai politoloģe Iveta Kažoka sovā blogā guodoj:

“Ko darīt ar … latgaliešu valodu? Vai pienākums aizsargāt latviešu valodu kā vienīgo valsts valodu uzliek iestādēm par pienākumu rūpēties par to, lai latgaliešu valodu tiktu saglabāta (piemēram, mācot to skolās) vai, tieši otrādi, turpināt noskatīties tās iznīkšanā, nostiprinoties latviešu literārajai valodai?”.

Pošreizejais preambulys definiešonys moments ir vareibu lūgs (window of opportunity), kas atsataisa natai bīžai, kab varātu tū ignorēt. Par nūžālu pagaidom latgalīši itamā lugā gaismu naredz.

http://www.lakuga.lv/2013/11/09/viduklis-preambulys-vareibu-luga-nav-gaismys-latgalisim/

http://www.ir.lv/2013/11/13/preambulys-vareibu-lugs-del-latgalisu

 

2 komentāri
Voldis Prancans November 4th, 2013

Na mozuok svareigs vaicojums ir par latvīšu (baltu) tautas gareiguos satversmes gūdā ceļšonu, kas īkodieta dainuos – navys nikur nanūformulietuom “kristeigojuom vierteibuom” (ar kū parosti saprūtam vyspuorciļvieciskuos vierteibas jeb vysuma lykumus, bet kas eisteneibā nav atrūdamas judo/kristīteibas dokumentūs).

Jureits November 5th, 2013

Par tū Levitam saceju jau pavasarī. Tūlaik jis pīkryta, ka itī vaicuojumi ari varātu tikt nūprecizāti preambulā. Kai redzim, tagad tuos malnrokstā par latgalīšu volūdu i Latgolu nikuo nav. Bet nu sovys puses izavieleju navys “ceptīs” publiskajā telpā – maņ tū jau tai laiku pa laikam kaids puormat 🙂 bet īsnīgt konkretus prīšklykumus preambulys redakcejis uzlobuošonai. Ka preambulā nabyus attīceigūs vaicuojumu atrunuojuma, tod ari maņ daīs bolsuot “ar kuojom” voi ari attīceigi – “pret” tuos pašreizejū redakceji.

Iekomentē!