Skreine.org

Vydsvuordam (middle name) ir sova svareiga vīta gondreiž sevkurā rītumu kultūrā. Vīnā vītā cylvāks jū daboj krystobuos, cytā vītā  - komplektā ar styprynuošonys sakramentu. Ir gadīņi, kod cylvāka īsauka teik dalykta kai vydsvuords i dzeivoj juo školys bīdru atmiņuos.

Vydsvuordam nav taida formaluo slūdze, kaida ir vuordam i pavuordei, par tū ar jū var breivuok izadareitīs. Jū var nūglobuot i jū var izceļt, atkareibā nu situacejys. Pastuovūt itaidai breiveibai vydsvuorda lītuošonā, patēmejit, kū vydsvuords myusim stuosta kotrā konkretā situācejā.

Jaunuo ASV prezidenta pylns vuords ir Baraks Huseins Obama. Huseins??? Nav breinums, ka atguodi par pošu amerikaņu nūgrauduotū Irakys prezidentu daļai amerikaņu līk iz itaidu vydsvuordu vērtīs ar napatyku. Par tū jau inauguracejys pasuocīnī vītom apsaguojās bez vydsvuorda, vītom lītuoja “Baraks H. Obama”.

Bet niu atpakaļ da Latgolai. Obamys īvieliešonai ASV ir lels simbolisms ari latgaļu lītā. CNN vierūs sižetu, kur afroamerikaņu sīvīte stuosteja, ka jei atguodoj laikus kod sīvītem nabeja bolsa tīseibu i malnuodainūs reideja ar suņim.  Bet tagad amerikys prezidents ir malnuodainais.  Pasauļs ir mainejīs radikalai. Ostoni godi atpakaļ, kod par prezidentu tyka kovbojs nu Teksasys, kurs varēja pīļaut, ka piec juo byus malnuodainais prezidents?

Latgaļi dzeivoj pasaulī, kur vaļsts nikamā natur jūs volūdu, pasauļavierīni  i navar viņ sagaideit, kod latgaļi pamess sovu volūdu i letonizēsīs. Puorstuos čapasluotīs latgaliskai i beidzūt suoks runuot eistynajā i pareizajā volūdā. I taišņi tagad vairuok kai nazkod Latvejai vajag sovu Obamu. Latgalisku Baraku Boņuku Obamu.